Пермское староверие - Главная
Свидетельства
Молитвослов
Катехизис
Закон Божии
Библия

СВИДЕТЕЛЬСТВА ИСТИННОСТИ



О КРЕСТНОМ ЗНАМЕНИ

Ведомо же буди и о сем. яко подобает всякому християнину ведати известно , како лице свое крестити крестообразно , и истово. и какова есть сила крестнаго знамения. и коль велико божественое таиньство в сложении перст. и чесо ради нарицаемся християне. да не посмеются ни да поругаются нам невернии , ниже да препрят нас и посрамят еритики своими нечистыми глаголы , зри опасно всякии пороженныи банею паки бытия.

В

оистину не презре нас господь своим милосердием , но и паче и помилова и призре на нас своею милостию с высоты святыя своея , и подаде нам имя ново , еже зватися християны. слово бо его истинно есть и праведно всегда , и николиже изменяется якоже рече. небо и земля мимо идет, словеса же моя не мимо идут. такоже и инде пророком исаием глаголя , работающым мне прозовется имя ново. се бо есмы прозвани именем новым мы християне , якоже рекл темже исаием к новым работником своим , и приидут и узрят славу мою , и оставлю на них знамение. и якоже рекл господь , тако и сотвори. остави знамение честныи крест. о немже предвидяше духом святым другии пророк , яко бы дивяся божией премудрости глаголя. дал еси боящымся тебе знамение , еже убежати от лица лука. о томже вси святии наследницы апостольстии, свидетельствуют сице. яко боящымся его верным и правым християном дадеся крест. имже знаменающе лица своя, убегают от лица лука, сиречь от всякаго навета и козней бесовских и иже уязвляют безпрестани сердца верных, лукавыя духи завидяще празднующым чисто и богоугодно живущым.

О том же глаголют святии отцы. егда приходит злыи помысл , или приводит тя ко греху , перекрести лице свое , и призови распеншагося на кресте глаголющи , господи исусе христе сыне божии помилуй мя. и тако удалится от тебе помысл лукавыи. и укрепишися в теплоте любве христовы. и будеши правым християнином единая соборныя апостольския церкве. тем бо вернии ведоми и явствени быша , не токмо сами между себе , но и пред неверными мучители. когда неких от них многих мучеников христовых мучиша злочестивии царие , возбраняюще им веровати во христа. и егда не могоша их от христа различными муками отлучити , повелеша им языки резати. и потом вопрошаху , еще ли веруют и проповедают христа. они же пред ними языком глаголати уже исповедания веры не возмогоша , но полагаху знамение честнаго креста рукою на лица своя. и тако по словеси апостольскому прославляли бога в душях и в телесех своих. потом же и кончину мученическую прияша.

Се же и от тех малых свидетелей явно ести яко и апостоли христовы , и мученицы, полагали знамение честнаго креста на лица своя рукою своею. в том бо глаголют святии отцы великая тайна святыя неразделимыя троицы отца и сына и святаго духа прославляется. и яже во святом крещении треми в воду погруженьми , тридневное христово погребение и воскресение быти показуется. якоже апостол глаголет. елицы во христа крестихомся , в смерть его крестихомся , и спогребохомся с ним крещением в смерть. приложи же и се. да якоже христос воста от мертвых славою отчею , тако и мы во обновление жизни ходити начнем. тому же подобно и знамением честнаго креста , все доброе веры таиньство учит нас познавати тайну. ибо три перста сложити вместо , великии и малыи , и третии что подле малаго , исповедуется тайна божественых трех ипостасей , отца и сына и святаго духа , единаго бога в трех лицех.

Два же перста вышнии и среднии великии вместо сложити и протянути , показуется тайна самого господа нашего исуса христа , иже есть совершен бог , и совершен человек. Той же среднии великии перст мало преклонити , исповедуется тайна , еже есть сын божии преклонь небеса , и сниде на землю , и бысть человек нашего ради спасения. Темже два перста сложив , первое кладет их на главу , или на чело. исповедуем , иже есть едина истинная и вечная наша глава христос , даде главу выше всех церквей , яже есть тело его. Таже полагаем их на живот , исповедуется снитие его на землю и еже в пречистей утробе богоматере безсеменное зачатие его , и девятомесячное обитание явствене возвещаем. той бо един пройде утробу ея , яко солнце стекло , не вредив ключа девыя рожеством своим. Таже полагаем их на правое плече , исповедуем яко седит одесную бога отца , дондеже положатся врази его подножие ног его. Таже на шуее плече полагаем образующе , яко приидет второе на суд , и воздаст сущым ошую муку вечную , и сущым одесную живот вечныи. И тако мы перекрестив лице свое знамением честнаго креста покланяемся богу молящеся , да бы нас шуяго стояния избавил , и благословение свое дал нам.

Блаженныи же феодорит глаголет , како подобает рукою креститися , сице благословити рукою и креститися. три персты равно имети вкупе , великии иже глаголется палец. да два последних исповедуется тайна по образу троическому. бог отец , бог сын , бог дух святыи. не три бози , но един бог в троице. имены разделяется , и божество едино. отец не рожден. а дух святыи ни рожден ни создан , но исходен. трие во едином божестве. едина сила , едина честь , едино поклонение от всея твари , от ангел и от человек. тако тем трем перстом указ.

А два перста вышнии , да среднии великии вместо сложити и простерти. великии же перст имети мало наклонно. то образует два естества христова, божество и человечество. бог по божеству , а человек по вочеловечению , во обоем совершен. Вышнии же перст образует божество, а нижнии человечество. понеже сшед от вышних , спасе нижния. Согбение же персту толкуется, преклонь бо небеса сниде на землю нашего ради спасения. Да тако достоит креститися и благословляти. тако святими отцы указано и узаконено. такова убо сила есть знамения честнаго креста, имже вернии знаменаемся, егда молимся , исповедающе таиньствене спасово смотрение, еже от бога и отца прежде всея твари рождение , и еже с выше на землю его снитие , и распятие , и второе его пришествие еже есть запечатление всему еже о нас человеколюбному смотрению.

То бо прообразуя ияков патриарх , сие же божественое страшное знамение , премени руце свои положи на крест , егда благословляаше внучата своя, ефрема и манасию , сыны иосифовы. Тако же и моисей егда повеле сыном израилевым еще во египте кровию агньца знаменати на четыре страны двери домов их , сиречь верхния и нижния пороги. и яже обоих дву стран колоды , да не внидет к ним погубляяи первородныя египетския. и то явствено прообразовал крест. Тоже знамение предобрази тойже моисей , егда жезлом своим прямо прорази чермное море. и разделися вода сюду и сюду. и бысть путь сух посреде моря. израильтяне же пеши немокреною ногою преидоша на он пол. по прехождении же их моисей темже жезлом образно впреки поразив чермное море. и слияся вода воедино совокупление , и потопи фараона мучителя. Такоже когда бысть сеча со амаликом людем израильтеским в рафидине. моисей же шед на гору, распростер руце крестообразно. и по которое время держал руце распростерши на крест , и в то время гнали израильтяне амаликово войско. а егда же отпустил руце , нача премогати и бити израильтян амаликово войско. того ради аарон и иор поддержаста ему руце , един со единыя страны , а другии со другия , и тогда израильтяне побиша всех амаликова войска. и то явно тоже было знамение и подобие честнаго креста. Темже образом видение и иезекииля пророка иже виде мужа облечена в ризы священнически. емуже рекл господь иди среди иеросалима , и дай знамения на лица мужеска, иже болезнуют , и воздыхают о беззакониих бывающих посреди их. и поби их всех на нихже знамение несть.

Что же противниче, еда , невозможно ли богу кроме знамения , или знаков онех , иже мазания кровию дверей на крест во египте , такоже и держания рук моисеовех на крест , или якоже и во иеросалиме дадеся людем на лица их знамение милосердия его и избавити их от погибели; ей возможно. но того ради повеле творити таковая знамения креста , да тем покажет над ними крепость милосердия своего. И о сем разумейте , яко то знамение бысть прообразование нынешнему кресту. аще хощете уведати со онеми святыми наследники апостольскими и ученики христовыми. ихже и сам апостол слушати , и с ними смотрения таин божиих отвека сокровенных разумети повелевает.

О том же блаженныи и феодорит толкует се ясне. Блаженныи же иезекииль пророк такоже показа в видении, иже виде мужа или ангела посланнаго от бога , да бы обшел все место. и положил на челе знамения уязвеным от беззаконных людей. той бо есть сень и подобие нашему знамению. истинное бо знамение мы от бога и от любве его прияхом крест. Афанасии же великии разуме оно слово пророческое , еже рече , дал еси боящымся тебе знамение , еже убежати от лица лука. верным поведа людем християном дано есть носити и имети всегда крест на лицах. то бо есть глаголет святыи кирил знамение, егоже бегает противник душ наших диявол. Тем бо глаголет василии великии, христовы мученицы яко хоруговию вооружившеся , и оградившеся крестом победиша диявола , и мучителей разрушиша , и еллинское многобожие упраздниша. С ними же златоуст иоанн , и инии мнози , испроста вси наследницы апостольстии , иже от апостолов по ряду друг другу пишут и воспоминают нам , да быхом коегождо дне , и коегождо часа , во всех делех наших начиная , и ложася , и вставая знаменати нам лице свое честнаго креста знамением не стыдяся. а не внимати неверным и прельщеным человеком. то бо есть знамение на обличение их самовластьства. О том бо глаголет василии великии. знамение сие яко венец царя нашего христа на главе своей носим.

Еще же бысть чюдо страшно и преславно и удивлению достойно. егда был мелетий патриарх антиохийскии. и при том собор бысть арияном с верными в лета его. и много глаголющым окаянным арияном , о развращении православныя веры, паче же о самом божественем таиньстве. и тогда востав богословесныи мужь мелетий патриарх , правила по закону управления имея , и людем просящым у него скораго учения. онже по божественей ему благодати , хотя еретики устрашити и посрамити , и вся люди удивити , показа им три персты , и не бысть знамения. потомже два совокупль , и един пригнув, и благослови люди. и изыде от него огнь яко молния. и достохвалныи он испусти глас. трие убо ипостаси разумеваем , о единомже существе беседуем , и тако посрами еретики. и вси людие страха и трепета исполнени быша , и святаго мужа похвалиша. и возрадовашася о божественей благодати , и о посрамлении еретик. Такова убо есть сила сложение перст , и крестнаго знамения.

Псалтырь. "О крестном знамении , како лице свое крестити крестообразно и истово"